ఇది కౌరవ సభ ?

మొన్న ఆదివారం ఇంట్లో హాయిగా టివి చూడకుండా పిల్లలతో కాలక్షేపం చేద్దాం అనుకుంటే ఉరుము లేని పిడుగు లాగ నా శ్రీమతి ఒక సారి మండలాఫీసుకి వెళ్ళాలి నాకు జనరల్ బాడీ మీటింగ్ వుంది అని ఒక ఆర్డినెన్స్ పాస్ చేసేసింది.(ఆర్దినెన్స్ పదం కరక్టే నంటారా )ఇక తప్పేదేముంది ఆదివారం ఇంట్లో వుంటే ఆడవాళ్ళకి లొకువ అనుకుంటూ సారథి కొలువు చేపట్టి బండి తీశా.మండలాఫీసులొ మహా జొరుగా వాగ్వివాదాలు జరుగుతున్నాయి.బయట మాత్రం పదిమంది రక్షకభటులు పొగ సేవిస్తూ తన్మయత్వం లో ఉన్నారు. ఇంతకు ముందెన్నడూ అంత సిబ్బందిని అక్కడ అలా చూడలా కుతూహలం అపుకొలేక మీరు ఇంతమంది వచ్చారు మినిష్టరు గాని మీటింగ్ లో వున్నారా అని అడిగా .వాళ్ళు ఇచ్చిన సమాధానం విని దిమ్మ తిరిగిపోయింది. "ఏమీ లేద్సార్ ఈ మధ్య సర్పంచులు ఎవరిని బడితే వాళ్ళని ఇష్టం వచ్చినట్లు సభలో కొడుతున్నారు. అందుకే వుద్యోగస్తులకి రక్షణ గా వచ్చాం "అన్నారు. ఔరా హతవిథీ గవర్నమెంటు ఉద్యోగస్థులకి ఎమి కష్టం వచ్చిందీ చివరకు రాజకీయనాయకుల (రాజకీయ గూండాలు ?)నుంచీ రక్షణ కోరవలసి వచ్చిందన్నమాట అనుకున్నా. ఏదో సినిమాలో డైలాగ్ "తొండ ముదిరితే ఊసరవెల్లి అవుతుంది రౌడీ ముదిరితే రాజకీయనాయకుడు అవుతాడు" గుర్తొచ్చింది.